اب اسباب پا جایئں ہم جانِ عالم ﷺ
پہنچ جائیں تیرے حرم جانِ عالم ﷺ
مدینے کو دیکھے ہُوا ایک عرصہ
مجھے کاٹ کھائے غم جانِ عالم ﷺ
تیرے در پہ افطاریاں پھر میں پاؤں
دکھا دے اپنا حرم جانِ عالم ﷺ
میرا نفس سرکش شب و روز مجھ پہ
بہت ڈھا رہا ہے ستم جانِ عالمﷺ
گناہوں نے ہائے مجھے مار ڈالا
کرم جانِ عالمﷺ کرم جانِ عالمﷺ
گناہوں کی آتش میری کب بُجھے گی
تو برسا دے ابرے کرم جانِ عالمﷺ
کرم نہ کرو گر خبر گر نہ لو گے
کدھر جائیں گے آہ ہم جانِ عالمﷺ
تو رکھ دے میرے سر پہ دستِ تسلّی
مِٹا دے میرے غم الم جانِ عالم ﷺ
سناؤں کسے کون میری سنے گا
میری داستانِ الم جانِ عالم ﷺ
جسے سن کے سینے سے اپنے لگا لوں
کروں نعت ایسی رقم جانِ عالم ﷺ
عبید رضا کا بھی دونوں جہاں میں
تو رکھ لے خدارا بھرم جانِ عالمﷺ